Pacchimacittasamaṅgīnaṁ yassa cittassa anantarā somanassasampayuttapacchimacittaṁ uppajjissati tesaṁ tattha somanassindriyaṁ uppajjittha, no ca tesaṁ tattha upekkhindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha somanassindriyañca uppajjittha upekkhindriyañca uppajjissati. Yassa vā pana yattha upekkhindriyaṁ uppajjissati tassa tattha somanassindriyaṁ uppajjitthāti? Suddhāvāsānaṁ dutiye citte vattamāne tesaṁ tattha upekkhindriyaṁ uppajjissati, no ca tesaṁ tattha somanassindriyaṁ uppajjittha. Itaresaṁ catuvokārānaṁ pañcavokārānaṁ tesaṁ tattha upekkhindriyañca uppajjissati somanassindriyañca uppajjittha.