Kāmāvacare pacchimabhavikānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha purisindriyaṁ na uppajjissati, no ca tesaṁ tattha itthindriyaṁ na uppajjittha. Rūpāvacarānaṁ arūpāvacarānaṁ tesaṁ tattha purisindriyañca na uppajjissati itthindriyañca na uppajjittha. Yassa yattha itthindriyaṁ na uppajjittha tassa tattha jīvitindriyaṁ na uppajjissatīti? Rūpāvacarānaṁ arūpāvacarānaṁ tesaṁ tattha itthindriyaṁ na uppajjittha, no ca tesaṁ tattha jīvitindriyaṁ na uppajjissati. Rūpāvacare arūpāvacare pacchimabhavikānaṁ tesaṁ tattha itthindriyañca na uppajjittha jīvitindriyañca na uppajjissati. Yassa vā pana yattha jīvitindriyaṁ na uppajjissati tassa tattha itthindriyaṁ na uppajjitthāti? Kāmāvacare pacchimabhavikānaṁ tesaṁ tattha jīvitindriyaṁ na uppajjissati, no ca tesaṁ tattha itthindriyaṁ na uppajjittha. Rūpāvacare arūpāvacare pacchimabhavikānaṁ tesaṁ tattha jīvitindriyañca na uppajjissati itthindriyañca na uppajjittha. Yassa yattha itthindriyaṁ na uppajjittha tassa tattha somanassindriyaṁ na uppajjissatīti? Rūpāvacarānaṁ tesaṁ tattha itthindriyaṁ na uppajjittha, no ca tesaṁ tattha somanassindriyaṁ na uppajjissati. Rūpāvacare pacchimabhavikānaṁ asaññasattānaṁ arūpānaṁ tesaṁ tattha itthindriyañca na uppajjittha somanassindriyañca na uppajjissati. Yassa vā pana yattha somanassindriyaṁ na uppajjissati tassa tattha itthindriyaṁ na uppajjitthāti?