Yassa yattha upekkhindriyaṁ na uppajjittha tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Suddhāvāsaṁ upapajjantānaṁ tesaṁ tattha upekkhindriyaṁ na uppajjittha, no ca tesaṁ tattha manindriyaṁ na uppajjissati. Asaññasattānaṁ tesaṁ tattha upekkhindriyañca na uppajjittha manindriyañca na uppajjissati. Yassa vā pana yattha manindriyaṁ na uppajjissati tassa tattha upekkhindriyaṁ na uppajjitthāti? Pacchimacittasamaṅgīnaṁ tesaṁ tattha manindriyaṁ na uppajjissati, no ca tesaṁ tattha upekkhindriyaṁ na uppajjittha. Asaññasattānaṁ tesaṁ tattha manindriyañca na uppajjissati upekkhindriyañca na uppajjittha. (Upekkhindriyamūlakaṁ.)