Suddhāvāsānaṁ dutiye citte vattamāne asaññasattānaṁ tesaṁ tattha kusalā dhammā na uppajjittha, no ca tesaṁ tattha abyākatā dhammā na uppajjittha. Suddhāvāsaṁ upapajjantānaṁ tesaṁ tattha kusalā ca dhammā na uppajjittha abyākatā ca dhammā na uppajjittha. Yassa vā pana yattha abyākatā dhammā na uppajjittha tassa tattha kusalā dhammā na uppajjitthāti? Āmantā. Yassa yattha akusalā dhammā na uppajjittha tassa tattha abyākatā dhammā na uppajjitthāti? Suddhāvāsānaṁ dutiye citte vattamāne asaññasattānaṁ tesaṁ tattha akusalā dhammā na uppajjittha, no ca tesaṁ tattha abyākatā dhammā na uppajjittha. Suddhāvāsaṁ upapajjantānaṁ tesaṁ tattha akusalā ca dhammā na uppajjittha abyākatā ca dhammā na uppajjittha. Yassa vā pana yattha abyākatā dhammā na uppajjittha tassa tattha akusalā dhammā na uppajjitthāti? Āmantā. 9.2.1.3. Anāgatavāra 9.2.1.3.1. Anulomapuggala Yassa kusalā dhammā uppajjissanti tassa akusalā dhammā uppajjissantīti? Yassa cittassa anantarā aggamaggaṁ paṭilabhissanti tesaṁ kusalā dhammā uppajjissanti, no ca tesaṁ akusalā dhammā uppajjissanti. Itaresaṁ tesaṁ kusalā ca dhammā uppajjissanti akusalā ca dhammā uppajjissanti. Yassa vā pana akusalā dhammā uppajjissanti tassa kusalā dhammā uppajjissantīti? Āmantā. Yassa kusalā dhammā uppajjissanti tassa abyākatā dhammā uppajjissantīti? Āmantā.