Yassa yattha akusalā dhammā na nirujjhanti tassa tattha abyākatā dhammā na nirujjhantīti? Sabbesaṁ cavantānaṁ pavatte akusalavippayuttacittassa bhaṅgakkhaṇe tesaṁ tattha akusalā dhammā na nirujjhanti, no ca tesaṁ tattha abyākatā dhammā na nirujjhanti. Sabbesaṁ upapajjantānaṁ pavatte cittassa uppādakkhaṇe arūpe kusalānaṁ bhaṅgakkhaṇe tesaṁ tattha akusalā ca dhammā na nirujjhanti abyākatā ca dhammā na nirujjhanti. Yassa vā pana yattha abyākatā dhammā na nirujjhanti tassa tattha akusalā dhammā na nirujjhantīti? Arūpe akusalānaṁ bhaṅgakkhaṇe tesaṁ tattha abyākatā dhammā na nirujjhanti, no ca tesaṁ tattha akusalā dhammā na nirujjhanti. Sabbesaṁ upapajjantānaṁ pavatte cittassa uppādakkhaṇe arūpe kusalānaṁ bhaṅgakkhaṇe tesaṁ tattha abyākatā ca dhammā na nirujjhanti akusalā ca dhammā na nirujjhanti. 9.2.2.2. Atītavāra 9.2.2.2.1. Anulomapuggala Yassa kusalā dhammā nirujjhittha tassa akusalā dhammā nirujjhitthāti? Āmantā. Yassa vā pana akusalā dhammā nirujjhittha tassa kusalā dhammā nirujjhitthāti? Āmantā. Yassa kusalā dhammā nirujjhittha tassa abyākatā dhammā nirujjhitthāti? Āmantā. Yassa vā pana abyākatā dhammā nirujjhittha tassa kusalā dhammā nirujjhitthāti? Āmantā.