Yassa yattha ghānindriyaṁ uppajjati tassa tattha purisindriyaṁ uppajjatīti? Saghānakānaṁ na purisānaṁ upapajjantānaṁ tesaṁ tattha ghānindriyaṁ uppajjati, no ca tesaṁ tattha purisindriyaṁ uppajjati. Saghānakānaṁ purisānaṁ upapajjantānaṁ tesaṁ tattha ghānindriyañca uppajjati purisindriyañca uppajjati. Yassa vā pana yattha purisindriyaṁ uppajjati tassa tattha ghānindriyaṁ uppajjatīti? Purisānaṁ aghānakānaṁ upapajjantānaṁ tesaṁ tattha purisindriyaṁ uppajjati, no ca tesaṁ tattha ghānindriyaṁ uppajjati. Purisānaṁ saghānakānaṁ upapajjantānaṁ tesaṁ tattha purisindriyañca uppajjati ghānindriyañca uppajjati. Yassa yattha ghānindriyaṁ uppajjati tassa tattha jīvitindriyaṁ uppajjatīti? Āmantā. Yassa vā pana yattha jīvitindriyaṁ uppajjati tassa tattha ghānindriyaṁ uppajjatīti? Aghānakānaṁ upapajjantānaṁ tesaṁ tattha jīvitindriyaṁ uppajjati, no ca tesaṁ tattha ghānindriyaṁ uppajjati. Saghānakānaṁ upapajjantānaṁ tesaṁ tattha jīvitindriyañca uppajjati ghānindriyañca uppajjati. Yassa yattha ghānindriyaṁ uppajjati tassa tattha somanassindriyaṁ uppajjatīti? Saghānakānaṁ vinā somanassena upapajjantānaṁ tesaṁ tattha ghānindriyaṁ uppajjati, no ca tesaṁ tattha somanassindriyaṁ uppajjati. Saghānakānaṁ somanassena upapajjantānaṁ tesaṁ tattha ghānindriyañca uppajjati somanassindriyañca uppajjati.