Yassa vā pana yattha paññindriyaṁ uppajjati tassa tattha cakkhundriyaṁ uppajjatīti? Ñāṇasampayuttānaṁ acakkhukānaṁ upapajjantānaṁ tesaṁ tattha paññindriyaṁ uppajjati, no ca tesaṁ tattha cakkhundriyaṁ uppajjati. Ñāṇasampayuttānaṁ sacakkhukānaṁ upapajjantānaṁ tesaṁ tattha paññindriyañca uppajjati cakkhundriyañca uppajjati. Yassa yattha cakkhundriyaṁ uppajjati tassa tattha manindriyaṁ uppajjatīti? Āmantā. Yassa vā pana yattha manindriyaṁ uppajjati tassa tattha cakkhundriyaṁ uppajjatīti? Sacittakānaṁ acakkhukānaṁ upapajjantānaṁ tesaṁ tattha manindriyaṁ uppajjati, no ca tesaṁ tattha cakkhundriyaṁ uppajjati. Sacakkhukānaṁ upapajjantānaṁ tesaṁ tattha manindriyañca uppajjati cakkhundriyañca uppajjati. (Cakkhundriyamūlakaṁ.) Yassa yattha ghānindriyaṁ uppajjati tassa tattha itthindriyaṁ uppajjatīti? Saghānakānaṁ na itthīnaṁ upapajjantānaṁ tesaṁ tattha ghānindriyaṁ uppajjati, no ca tesaṁ tattha itthindriyaṁ uppajjati. Saghānakānaṁ itthīnaṁ upapajjantīnaṁ tāsaṁ tattha ghānindriyañca uppajjati itthindriyañca uppajjati. Yassa vā pana yattha itthindriyaṁ uppajjati tassa tattha ghānindriyaṁ uppajjatīti? Itthīnaṁ aghānakānaṁ upapajjantīnaṁ tāsaṁ tattha itthindriyaṁ uppajjati, no ca tāsaṁ tattha ghānindriyaṁ uppajjati. Itthīnaṁ saghānakānaṁ upapajjantīnaṁ tāsaṁ tattha itthindriyañca uppajjati ghānindriyañca uppajjati.